investment

Namili ako sa book store.
Mga libro.
Sandamakmak.
Babasahin niyo po lahat yan?
Hindi, ibebenta ko. Sagot ko yan, sa loob loob ko. Sa totoo, ang sagot ko, syempre miss. Babasahin ko yan. Yan naman ang ginagawa sa libro di ba?
Dami po kasi. At ang mamahal. Sana mabasa niyo lahat, para di sayang.
Talaga. Babasahin ko lahat. Sayang talaga kasi pag di ko binasa, para lang akong nagtapon ng pera.

Para sa akin, para saan ang pagbabasa?
Investment.
Dati, nagbabasa ako para mag-enjoy.
Ngayon, nagbabasa ako para i-share sa iba ang enjoyment ko, at mga natutunan ko.
Mas nagiging sulit kasi ang pagbabasa.
At mga ginastos.
Makita ko lang kasi na napakinabangan ang nabasa ko
Pati ako busog na din.

Ano ba talaga para sa akin ang investment?
Isang bagay na nagpuhunan ka, at sana ibabalik saiyo ng mas malaki.
Sa tingin ng iba, may mga risky investments at mga good investments.
Safe ka sa investment na edukasyon.
Kahit gumastos ka ng malaki sa tuition ng anak mo, igagapang mo, pawis at dugo.
Kasi magandang investment yun sa kinabukasan ng anak mo.
Maging sa Ateneo man siya enrolled o sa Matute House of Fashion.
Safe ka sa investment na negosyo o di kaya trabaho.
Kahit magpuyat ka umaga at gabi, gagawin mo.
Kasi magandang investment sa kinabukasan mo at ng iyong pamilya.
May mga pyramid scams.
Milyones ang kanilang nakukuha,
Madami kasi ang naloloko. At nagpapaloko.
Napaka-unsafe na investment nyan.
Sugal.
At sa totoo lang, wala pang nananalo sa sugal.

Bakit ba ako nag-iinvest sa mga libro?
Kasi nakakahiya pag naimbitahan ako para magtalk.
At wala akong masabi. Kesa naman magbigay ako ng jokes na napupulot sa wowowee.
Di naman ako nanonood noon.
Boring siguro kung puro karanasan ko lang eh mas maganda, at exciting, kung personal na karanasan ng mga mga bayani at santo.
Meron akong mga nakakasalamuha, pero mga silent heroes and saints kumbaga.
Bihira lang ang mga nagsusulat tungkol sa kanila.
So far kasi, wala pa akong nakasalamuhang pormal na itinalaga na santo ng simbahan. Normally kasi, kailangang namatay ka na, o pinatay, bago ka gawing santo.
At mas lalo ng wala pa akong nakahalubilong opisyal na bayani ng pamahalaan.
Sana naman, bago ako mamatay, may masilayan akong opisyal na pagtatanghal ng mga bagong bayani ng bansa, lalo na mga pulitiko.
Kaya sa libro ko na lang nababasa ang mga tungkol sa kanila.
Lola ko nagkwento sa akin dati ng mga tungkol sa santo.
Pero I’m sure, nabasa nya din yun sa libro.
May mga bagong proyekto at plano ang parokya.
Kailangan kong manguna sa pag-aaral.
Bumili ako ng mga libro para may mai-share sa mga lideres at parokyano.
Mga libro sa pastoral management, leadership, spirituality, financial literacy, etc, etc.
Umabot ng limang libo ang halaga.
Ang mga pahina nya, marahil higit pa dun. Sana di ako abutin ng ganun kadaming araw sa pagbabasa.
Baka nalipat na ako ng parokya, di pa ako tapos magbasa.
Nakasama ko ang nanay ko ng mamili.
Nagtaas siya ng kilay.
Sabi ko, investment to.
Pati isa pang kilay niya, tumaas din.
Ba’t kaya di ko namana yun?
Ok na din. Pasalamat na din nagaya ko sa kanya ang kapayakan.
Walang alahas. Di nagmamake-up. At di naglilipistik.
Pag kabaliktaran ginawa ko, tyak, maraming magtataasan ng kilay.
Naimbitahan ako magtalk sa isang community.
Doble pa sa halaga ng pinamili kong mga libro ang binigay sa akin.
Gusto kong tawagan ang nanay ko at sabihan, see, I told you!
Pero di ko na ginawa. Baka kasi humingi pa ng komisyon at kung anoano pa ang gawin sa kilay niya.
Anumang makuha sa ministry, kailangang ibalik sa ministry, kung hindi baka pati si Lord magtaas ng kilay.

Syempre, the best investment ay ang pagsunod sa kautusan ni Hesus:
Mahalin mo ang Diyos ng buong puso at buong kaluluwa.
Mahalin mo ang iyong kapwa tulad ng iyong sarili.
Pag nagpuhunan ka sa ganun, tiyak, mas malaki ang babalik sa iyo
Sa totoo lang, higit pa sa iniisip mo.
Sa totoo lang, di mo lubos maisip ang kayamanang matatanggap mo.
Subukan mo.
Di sugal to.
Sigurado, panalo ka.