mayaman

Tuesday, 20th Week in Ordinary Time, Year B

Noong nakaraang linggo, nagkaroon ng brainstorming ang mga miyembro ng finance council at microlending tungkol sa mga dagdag na pamamaraan para matulungan ang mga miyembro mg microlending at sinumang miyembro ng parokya na mapalawak ang financial literacy. Para magabayan sila sa pag-asenso sa buhay. Para matulungan pangalagaan ang perang kinita at ang hanap buhay na pinagpapaguran. Isa sa mga gagawin ay series of modules on basic financial literacy at may kaakibat na pagtuturo na pang spiritwal. Pangunahing libro na gagamitin bilang basehan ng pagawa ng modules ay yaong sinulat ni Bo Sanchez “8 Sikreto Para Maging Tunay na Mayaman.” Gagawin natin ito para matulungan ang kapwa, magkaroon ang kapwa ng pera, umasenso sila sa buhay, at maging mayaman, sa madaling salita.
Pagkatapos, maririnig natin sa ebanghelyo, sinasabi ni Hesus, mahirap para sa isang mayaman na makapasok sa kaharian ng Diyos!
Parang ang hirap unawain!
Nahirapan ka ng tumulong sa tao maghanapbuhay siya at magkapera.
Nahirapan na siya magtrabaho, kumita at mag-alaga ng pamilya.
Pagkatapos, pag umasenso na, maririnig niya - mahihirapan siyang pumasok sa kaharian ng Diyos!
Parang unfair ata.
Sa unang tingin, mukhang pinapaboran pa ata ang mga taong ang tanging motto ay - di baleng tamad, di naman pagod.

Sa aking palagay, ang isang susi na maaring gamitin para mabuksan ang mahiwagang salita ni Hesus ay matatagpuan sa pagtingin sa reputasyon ng tao, sa pagkakakilala sa atin, base na rin sa ating ginagagawa.
May mga taong mayayaman at kilala bilang mapagbigay. Kasi yun ang ginagawa. May mga taong mayayaman at tinatawag na kuripot kasi kahit isang kusing di makuhang magbahagi.
May mga taong mahihirap din at kilala na mapagbigay, kasi ganun talaga sila. May mga mahihirap at binabansagang kuripot dahil di talaga nagbibigay kahit anong pilit pa ang gawin.
May mga pari din na ang reputasyon ay mukhang pera. Masungit. Tamad. O di kaya mabait, masipag, matulungin. Kasi ganun ang pinapakitang ugali at gawain.
May mga taong kilala na banal, mayaman o mahirap, pari o hindi. Kasi yun ang priority nila sa buhay, ang mahalin ang Diyos at ang kapwa.
Kapag tinawag kang mayaman, di dahil lamang ito sa hawak mong kayamanan, kundi dahil sa attitude mo tungkol sa iyong yaman.
Priority ang yaman. Di ang Diyos.
Kaya mahihirapan makapasok sa kaharian ng Diyos.
Dahil sila mismo di pinili ang Diyos.
Di sila mahihirapan pumasok sa kabilang kaharian.
Kasi yun mismo ang pinili at ginusto nila.
Ang tanong at hamon sa atin, ano ba ang pagkakakilala saiyo ng iba?
Sapagkat malamang, yun na yun ang ginagawa mo.
At yun ang magiging susi kung saang kaharian ka madaling makakapasok.