nakakainsulto

Nakasaad sa ating konstitusyon, Article 7, Section 2, para makapaglingkod ang isang tao bilang presidente ng republika ng Pilipinas, kailangan na siya ay umabot na sa edad na 40, nakarehistrong botante, marunong magbasa at magsulat, mamamayan ng Pilipinas simula pa pagkapanganak at nanirahan sa bansa sa loob ng sampung taon.
Walang sinabi tungkol sa academic degrees. O sa height.

Ibig sabihin, may pag-asa ang samutsaring tao,
Maging titulado sa kilalang unibersidad katulad ng up o ateneo
O di kaya ordinaryong mamamayan katulad ni mamang sorbetero.

Mas maganda kaya kung di na lang edukado ang presidente natin?
Abogado naman tulad ni Marcos pero andaming recorded na human rights violation.
Ekonomista naman katulad ni Arroyo pero as per record, naghihingalo ang ating ekonomiya.
Kaya lang kasi, sinubukan na din natin ng isang school drop out katulad ni Erap, pero kahit termino niya, drop out pa din.
Kahit nga jail term niya, di kayang tapusin.
Minsan kasi napapailing na lang ako sa mga nababasa kong sagot ng mga opisyales at miyembro ng gabinete natin na may pinag-aralan.
Hahayaan daw ba natin ang isang presidente natin na kumain sa ordinaryong kainan?
Sa loob loob ko, katulad ng ordinaryong burger stand na kinainan ni Obama at Biden?
Hahayaan daw ba natin magutom na lang ang ating presidente?
Pwede kaya pahingi ng listahan ng menu nila at ipapakita ko sa aking mga parokyano na ang ilan ay nagdidildil na lang sa asin para may mailagay sa tiyan?
At hahayaan daw ba natin na sumakay siya sa eroplano na di tayo sigurado ang seguridad.
Kasama ba dito ang commercial flights?
Parang ayaw ko na tuloy lumipad, unless maglabas ng ad si Lucio tan at Gokongwei at magsabi na safe ang mga eroplano nila?
At paano naman kung government planes?
Kawawa naman ang ating air force.
Bawat lipad pala nila, kailangan manguros kasi kung ganun eh isang paa mo nasa libingan na.
Kung ako ang tatanungin, mas maganda pa, bigyan natin ng first class na mga fighter planes ang ating mga sundalo.
Tutal, mas madalas sila lumipad kesa ki GMA. O teka, mas madalas pala lumipad si GMA.
Eh takot naman pala siya sumakay sa flying coffin,
Takot naman pala siya mamatay,
Takot naman pala siyang humarap ki Lord,
Bakit kaya?

Sa akin lang ha, nakakainsulto ang mga sagot nina Remonde et al.
Parang tingin, di tayo marunong mag-isip.
Para naman din daw ito sa susunod na presidente, ang napakagandang jet.
Di kaya naiinsulto si Mar Roxas noon, kung sakaling manalo siya
na iba na ang nagdesisyon sa kanya kung ano ang sasakyan niya, maliban sa padyak?
Di kaya nakakainsulto kay Mike Velarde yun, kung sakaling siya ang manalo,
Na iba na ang magdesisyon sa kanya, kung ano ang sasakyan niya,
Sa pagpunta sa mga barangay o di kaya prayer meetings?

Naiinis ako pag may mga ganung sagot na nakakainsulto sa aking likas na katalinuhan na bigay ng Diyos.
Minsan gusto kong kalimutan na ako ay isang pari at gusto ko silang batukan.
Pero, teka lang,
Bat ako magagalit sa kanila?
Bat ako maiinsulto?
Eh sino ba ang humalal sa kanila?
Sino ang naglagak sa kanila sa ganung posisyon?
Di ba tayo?
Bago tayo mapikon at mainsulto,
Bago tayo mangalaiti sa galit,
Isipin din natin ang ating sariling pagkukulang
At kung sino ang unang dapat batukan.

PS. At huwag mo din talagang subukan batukan ang mga opisyales ng pamahalaan. Sana magdalawang isip ka. Malulupit ang PSG sa kanilang pinapanghawakang pangako na ipagtanggol ang ating mga piniling punong tagapaglingkod. Tingnan ko lang kung gamitan ka ng maximum tolerance.